Z Chóśebuza/Cottbus. We wobłuku měsćańskego swěźenja buźo pśiducu sobotu, 22. junija, wót zeger 14:00 do 18:00 na rbb-jawišću w Puškinowem parku 12. „Serbski swěźeń“, kenž stoj pód patronatstwom Holgera Kelcha, wušego šołty města Chóśebuz.

Program Serbskego swěźenja wopśimjejo bogaty program wót młodeje dolnoserbskeje muziki pśez serbsku folk-, jazz- a popmuziku až k zukam staroserbskich instrumentow. Diana Šejcowa a Gregor Kliem wót Rozgłosa Barliń-Bramborska (rbb) buźotej moderěrowaś.

Prědny raz jo źiśeca rejowaŕska kupka „Łužičanka“ wót budyšyńskego Serbskego ludowego ansambla z pisaneju serbskeju folkloru a žortnymi źiśecymi spiwami w Chóśebuzu pódla. Rejowańska kupka „Barbuk“ w serbskej drastwje buźo publikumoju kazaś, pód nawjedowanim rejowańskego choreografa Michaela Apela soburejowaś. Folkloristiski intermezzo ze srjejźneje Łužyce pórucyju Grodkojske gólańske gerce a wót Düpplingowych gercow zaklincyju zuki starosłowjańskeje muziki.

Nowe impulse dostanjo Serbski swěźeń teke pśez jazzmuziku wót „duo LeDazzo“ a ze serbskeju popmuziku wót „Młodnych“.