Z Myšyna/Müschen. Wjele towzynt woglědari jo we cełej Nimskej swětkowne pónjeźele, na 26. Nimskem dnju młynow, póžyło góźbu, aby se wopóznali z historiskimi a aktiwnymi młynami. Pawlikojc wódny młyn w Myšynje jo tejerownosći wjeliku licbu woglědari pśiwabił. To jo slědny aktiwny wódny młyn we cełej Bramborskej!

Myšyński młyn na Kśišowce mlejo wót lěta 1848 trajdu. Lubnjojski kněžk von Lynar jo tencas to młynikojske pšawo na tom měsće dał młynikoju Kerstanoju. A hyšći źinsa stoj tudy wjeliki, naglědny młyn – wjele wětšy ako ten prědny z lěta 1848. Źinsajšny chrom jo z lěta 1904.

Źinsa źěłatej tudy dwa młynika: Dirk Pawlik (lětnik 1965) a jogo syn Stephan (lětnik 1989). Druge cłonki familije pomogaju sobu, aby te walce, kśidy a transmisiske rjemjenje (Riemen) funkcioněrowali. „To jo naša cesna familijowa tradicija. Naš stary nan tśeśego narodu Wilhelm Pawlik jo we lěśe 1890 ten młyn kupił. A my wjeźomy to źěło dalej – z wjaselim, lubosću a fachowym wěźenim“, wulicujo Casnikoju Dirk Pawlik. Wón njejo jano wuwucony młynik, ale wót nowembera teke wótpósłany Serbskego sejma.