Z Města/Cottbus. Fontane, zasej a zasej Fontane! Na wjelgin wšaki part buźo se lětosa na to spominaś, až rowno pśed 200 lětami jo se naroźił Theodor Fontane, ten znaty nimski spisowaśel, žurnalist a awtor. A lěcrownož jo ten narodny źeń, ten 30. december 1819, akle na kóńcu lěta, jo se to cesćenje a spominanje na njogo južo dawno zachopiło. To płaśi wósebnje za młoge wětše a mjeńše wustajeńce, w kótarychž žywjenje a statkowanje teje znateje paršony se na wjelgin wšakoraki part pśedstajijo.