Z Chóśebuza/Cottbus. Pětki su mjaztym znaty termin za demonstracije za dobru klimu. Gibanje „Fridays for future“ (Pětki za pśichod), źož wukniki „štrajkuju“ a demonstrěruju, jo se rozšyriło.

Zachadny pětk jo była demonstracija za klimu w Chóśebuzu. Góźba jo była 21. Bramborski źeń energije w uniwersiśe BTU. Tam su se politikarje, zastupowarje firmow (LEAG, Verbio AG, Siemens, Enertrag) a uniwersity pśednosowali a se wuměnili k změnje wobchada (Verkehrswende) a k „Energiji za strukturnu změnu“.

Ako na łońskem dnju energije su teke lětosa luźe protestěrowali pśeśiwo energijowej politice w Bramborskej. Kaž łoni jo stojało zdźaržanje jsy Prožym we srjejźi. W lěśe 2018 su zastupniki „zelenych“ kupkow demonstrěrowali pśed uniwersity. Lětosa njejo wjednistwo uniwersitu to dowóliło. Togodla jo se jadnab 50 luźi zmakało na zwuraznjenje swójog měnjenja pśi měsćańskej studni (naměsto Herona).