Serbski sejm a Grundtvigowa załožba za politiske kubłanje (Grundtvig-Stiftung) stej zachopjeńk apryla organizěrowałej we Złem Komorowje konferencu na temu „Zakładna kazń a mjeńšynowe pšawa ‒ trjebna diskusija w Nimskej?“ (Grundgesetz und Minderheitenrechte – eine notwendige Diskussion in der Bundesrepublik Deutschland?). Wóna jo měła wótglědanje, impulse k tomu daś, kak nowe wujadnanje mjazy serbskim ludom a nimskim statom (statne dogrono) mógało se realizěrowaś.

Sejm jo sebje prědk wezeł, pšawa Serbow na nowy fundament stajiś. We wažnych wěcach, ako serbski lud nastupaju, deje Serby móc sami swóje pótrjebnosći organizěrowaś, pśedewšym šulstwo a kulturu. Wažna kšoceń na tej droze wobstoj we tom, mjeńšynowe pšawa do zakładneje kazni (Grundgesetz) Nimskeje zapisaś ‒ jo měnił Peter Kroh z Neubrandenburga. Wón jo se dowołał na mysli a ideje swójogo starego nana, wuznamnego serbskego politikarja a casnikarja we casu Weimarskeje republiki Jana Skale.