Zachadnu njeźelu su wu nas wólby byli, komunalne kaž tež europske. Kake su wuslědki komunalnych wólbow w našych městach a gmejnach? Městna dla njejo móžno, na wejsne pśirady glědaś. W městach njejsmy wše małe partaje napisali.

W městach

W Chóśebuzu jo AfD dostała nejžwěcej głosow, 22,3 %. Za CDU jo se 17,2 % luźi rozsuźiło, za SPD 15,6 %, za Lěwicu 13,7 %, zjadnośeństwo „Naš Chóśebuz“ 9,4 % a Zelene 9,1 %. Wót serbskich kandidatow za Lěwicu a Zelene, ako smy pśestajili w Casniku, njejo nicht pśišeł do měsćańskego parlamenta.

We Wětošowje jo CDU dostała 31 %, AfD 16,4 %, SPD 14,9 %, Wäh-lergruppe Ortsteile 13,3 %, Zelene 10,9 %, Lěwica 10,4 % a Łužyska alianca 1,6 %. We Łazu (Laasow, ku Wětošowu) jo Łužyska alianca dostała 20,1 % głosow. Tam stej Hanzo Wylem-Kell a Daniel Graf kandiděrowałej za wejsnu pśiradu.

W Grodku jo dostała AfD 26,6 % głosow, CDU 25 %, Lěwica 11,8 %, SPD 10,7 %, Die nächste Generation 10,1 %, Zwisk 90/Zelene 2,4 %. Birgit Kaufholdowa (Lěwica) buźo w měsćańskem parlamenśe.

We wokrejsnych sejmach

We wólbach za sejm Wokrejsa Sprjewja-Nysa jo dostała AfD 26,53 %, CDU 20,54 %, SPD 15,01 %, Lěwica 12,29 %, Zelene 4,63 % a Klincańska runda 2,33 %. We sejmje budu teke Fred Kaiser, Guido Kabiš a Egbert Piosik.