Kóńc tyźenja (wót 24. do 26. maja) buźo wšykno we muzeju w Dešnje a we wjasce Stary lud se wjerśeś wokoło słowjańskego srjejźowěka.

Pětk buźo pó tradiciji wědomnostny kolokwium z tśimi referatami: 1. archeologa dr. Rudolf Voß ‒ „Legendarna swětnica Rethra“ (zeger 15.00); 2. Dr. Arne Lucke, direktor Archeologiskego centruma Hitzacker ‒ „Wjeraški archeologiskich wurywanjow we Hannoverskem Wendlanźe“ (zeger 16.00); 3. Katharina Schmeiduchowa, doktorandka Serbskego instituta ‒ „Słowjańske kultowe jaja a šćěrkawy“.

Sobotu a njeźelu buźo wót zeger 11.00 do 17.00 slězy cerkwje wjeliki ruš. Cełe familije we płatowej a wałmjecej drastwje budu bydliś we słowjańskich wjažkach a se žywiś kaž naše wóścy we 10. stolětu. 80 rucnikarjow z Nimskeje, Pólskeje, Českeje, Dańskeje a Nižozemskeje buźo pokazowaś swójo historiske rucnikaŕstwo: wóni budu kamjenje tśasaś, wót roga pyšnotki tšugaś, płat barwiś, głažane parle gótowaś a broncu škrěś.

Gerce Düpplinger Spielleut budu pód płatowym kšywom graś na srjejźowěkowych instrumentach: na šwikałkach, měchawje a bubonje. „Pśezpólne“ budu spiwaś na serbske.