Ten kóńc tyźenja buźo w Lubinje wjeliki cełonimski drastwiny swěźeń z drastwinymi towaristwami a kupkami z cełeje Nimskeje.

Pětk (17. maj), zeger 18.30 budu jen wótwóriś na Grodowej kupje. Srjejźnonimski zwěstk za domownju a drastwu buźo pokazaś program. Zeger 20.00 buźo na marku koncert nAund.

Sobotu budu wobźělniki swěźenja se w ludowej drastwje pśepokazowaś, a to na tśich městach wót 10.30 do 18.00: Na Grodowej kupje, na marku a pśi rěce (Spreeufer).

Kradu zeger 10.55 na Grodowej kupje buźo serbska drastwina kupka ze Žyźinego (Seidewinkel) pla Wórjejc prezentěrowaś wórjejsku drastwu a nałogi. Zeger 17.00 na marku buźo wustupiś Nimsko-serbski ansambel z Chóśebuza.

Pśi rěce zeger 10.30 wustupijo drastwina kupka Nowa Niwa. Źiśece serbske reje pokažo tudy zeger 12.20 lubinska źiśownja Lutki. Zeger 17.10 buźo kupka Stara lubosć prezentěrowaś serbsku drastwu chóśebuskich stronow a rejowaś.

Zeger 19.00 buźo na Grodowej kupje zgromadny program wšyknych regionalnych zwěstkow za drastwu. Zeger 20.00 buźo na marku koncert Polka-Beats.