W Dolnej Łužycy wobleka se jano hyšći gjarstka žeńskich kuždy źeń wšednu bursku drastwu. Nejmłodša jo drje Anni Lindnerowa z Kósobuza. Z Majberka znajomy sotšu Schultchenowu, w Nowej Jsy pla Picnja jo pśed dwěma lětoma wumrěła Lowiza Lindnerowa, ako jo ako slědna we jsy se kuždy źeń burski woblekała. A tak wuglěda to wšuźi w serbskich jsach Dolneje Łužyce. Ale kak jo to w katolskej Górnej Łužycy? Jadnu žeńsku, kótaraž nosy kuždy źeń swóju bursku drastwu, comy how pśedstajiś: Hanžu Młynkowu ze jsy Hórki/Horka pla Kamjeńca, kótaraž jo njedawno swěśiła swój 90. narodny źeń.

Ja som Hańžu Młynkowu z Hórkow zeznał prědk wjele lět. Ja se dopominam na nju ako na žeńsku z wjasołym, rědnym woblicom w akuratnje woblaconej serbskej katolskej swěźeńskej drastwje pśi boku swójogo mjaztym za­mrě­tego manźelskego Franca Młynka. Ten samy jo był tegdy šołta w Chróśćicach/Crostwitz.