Z Raduša/Raddusch. Ga su w Radušu, w tej wjelikej nimsko-serbskej jsy mjazy Wětošowom a Lubnjowom, na kšomje Błotow, raz źiwadło grali? To nichten tak pšawje njewě. Móžo pak byś, až su we wjelgin starem casu, pśed sto a wěcej lětami, tam teater grali, tak ako w młogich drugich serbskich jsach w Dolnej Łužycy. Wěrno pak jo, až su byli komedijanty pó lěśe 1990 južo raz tam. Serbske pupkowe źiwadło z Budyšyna ga jo tam wustupiło w tamnej źiśecej zagrodce „Marjana Domaškojc“, źož ga wuknu źowća a gólcy pó WITAJ dolnoserbsku rěc. Ako su wulicujo, jo se to tym źiśam wjelgin spódo-bało.
Něnt, 4. maja, jo pśijěło wjelike profesionalne źiwadło do Raduša. Grajaŕka a tśo grajarje z Nimsko-serbskego ludowego źiwadła z Budyšyna ga su tam pśedstajili swóju nowu dolnoserbsku inscenaciju „Łapanje šefa“.