Z Dubrawy/Trattendorf pla Grodka. Na 29. aprylu jo zamrěł Fryco Dubjel (Dubiel), 92 lět stary, z Dubrawy. Wón jo cas žywjenja bydlił we swójej narodnej jsy, a jogo statki a wugbanja za wjas a jich wobydlarje wóstanu napśecej we spomnjeśu luźi.

Fryco Dubjel jo se wuwucył we młodych lětach we źěłaŕni prědneje wjelikeje dubrawskeje elektraŕnje. Pó njeglucnej słužbje na fronśe jo pśišeł slědk do jsy. Wjele źaset lět jo wón był aktiwny pla dobrowólneje wognjoweje wobory w Grodku. Wón jo se pśecej pilnował, něco za swóje wejsanarje cyniś. A jo pśemógł druge za swóje ideje zapaliś. Na ten part jo nastał we 1970tych lětach kulturny centrum „der Grüne Berghang“ (to jo se stało we ramiku gibanja Nationales Aufbauwerk), ak jo był daloko a šyroko znaty. Swěźenje, ako su se tam swěśili, su změstymi pśewušyli grodkojske domowniske swěźenje. We lěśe 1988 jo Fryco Dubjel, tencas pśedsedaŕ Domowinskeje kupki, spórał Serbski kulturny festiwal do Dubrawy. To jo nejwětšy swěźeń, ako jo gdy raz we jsy był! Ceła wjas jo se pśeměniła do wjelikego swěźenišća.