Z Pódstupima/Potsdam. Na pósejźenju Rady za nastupnosći Serbow pśi krajnem sejmje w Bramborskej 30. apryla w Pódstupimje su wažne temy na bliźe byli. Na pśikład kubłanje.

Nowy šulski raźc za Serbow

W šulskem amśe Chóśebuz jo se za nas wažna personalna změna stała. Michael Koch, dłujkolětny šulski raźc za serbsku wucbu w zakładnych šulach, njejo wěcej tam. Wón jo nowy decernent, mjazy drugim za kubłanje, we wokrejsu Sprjewja-Nysa.

Jogo naslědnik w šulskem amśe jo Frank Nedoma, Serbam znaty ako šulski wjednik Mozaikoweje zakładneje šule w Picnju. Nedoma jo se na pósejźenju Serbskeje rady wósobinski pśedstajił a jo měnił, až jo na zachopjeńku w Picnju ako šulski wjednik pytał za partnarjami za to serbske. Ale wóni su, tak jo měnił, kšac pó kšacu se minuli.

Glědajucy na serbsku wucbu jo gronił, až wiźi licbu serbskich ceptarjow, we pśirownanju z drugimi pśedmjatami, ako dosegajucu.

Witaj-ewaluacija: ceptarjam to słowo daś