Z Noweje Niwy/ Nowa Niwa. Teke lětosa pyšni jatšowna krona tu murjowanu studnju na jsy. Z njeju jo zwězane interesantne tšojenje: W lěśe 1927 jo wjelika wóda do jsy pśišła a dwóry a drogi pólała. A teke wóda k piśeju we studnjach jo se pśez nju skazyła. Nastał jo tšach, až luźe schórjeju a zbóžo wuslěknjo.
Pśijaśele a něgajšne wobydlarje Noweje Niwy, někotare bydlece we drugich krajach, su we tej nuzy złožyli pjenjeze za nowu studnju gromadu. A ta nowa studnja jo była 28 m dłymoka a jo dejała wšyknym wejsanarjam słužyś. Hyšći źinsa dopomina naglědna kamjenjana tofla na to tšojenje.
Wejsanarje, k dopomnjeśu na tu zmilnu pomoc, pyšnje tu studnju wót togo casa kužde lěto k jatšam. Žeńske a cłonki wognjoweje wobory a drastwinego towaristwa Nowa Niwa, kaž teke druge pomocniki pśigótuju to pyšnjenje z jatšownych jajow. K eksemplu kowal Wilfried Faber, jo zgótował z drota skelet teje krony, na kótaremž wise jatšowne jaja.