Wót 8. do 10. apryla jo se wótměwała 53. Centralna olympiada serbskeje rěcy we Wodowych Hendrichecach/Seifhennersdorf. Dogromady jo se na njej wobźěliło 97 wuknikow, wót togo 36 z Dolneje Łužyce. Licba dolnoserbskich wobźelnikow jo była dwójc tak wusoka ako łoni.

Źiśi su měli docyniś tśi typy nadawkow: pisny źěl, wustny źěl a pśigótowaś plakat. W pisnem źělu jo dobydnuła Hanna Huchacojc z Dolnoserbskego gymnaziuma (DSG). Na drugem městnje jo była Nele Riedelojc ze zakładneje šule „Lutki“ we Žylowje. Tśeśe městno jo dostała Clara Schwiegojc, kótaraž teke na DSG wuknjo. Wukniki ze šule w Brjazynje su wjelgin dobre rezultaty měli.

We wustnym źělu su te dobywarje: Amira Komolkojc, Laura Johnojc (wobej DSG), Nele Riedelojc, Simon Sperling (Žylow), Nina Aschendorfojc, Emma Hapacojc (zakładna šula Janšojce), Justin Župan (Schuppan), Lilly Röhmerojc a Anni Norah Skolzenojc (zakładna šula Brjazyna). Teke ten nejlěpšy plakat jo dostał wót ABC-eja wósebne myto (rěcne graśe „Tšojniki“).