Z Mrocneje/Pretschen. 14. apryla jo Serbski sejm w Mrocnej wobradował. Wjas lažy w gmejnje Markojska góla/Märkische Heide we wokrejsu Damna-Błota. W Mrocnej jo wejsna pśirada pśewjadła pśed pór lětami napšašowanje wobydlarjow, lěc kśě byś w serbskem sedleńskem rumje. Dokulaž wětšyna tych luźi, kótarež su se pśi tom wobźělili, za to była, jo wjas se sama póznała, až pśisłuša serbskemu teritoriju.

Starobna prezidentka Serbskego sejma Edith Pjeńkowa jo měniła napśeśiwo Casnikoju, až jo była zaźiwana wót aktiwitow we tej jsy. Mrocna jo dobyła 2012 krajne wuběźowanje „Naša wjas ma pśichod“. Na zwězkowej rowninje su dobyli slobro. Maju wejsnu lodu, źiśownju a wjelike ekologiske rolnikaŕstwo we tej małej wótlažanej jsy z mjenjej ako 300 wobydlarjami.

Pśi wuchójźowanju pó jsy z Gün-therom Thiele, něgajšym wejsnym zastojarjom a dalšnymi wobydlarjami jo se wótpósłańcam Sejma pśed-stajiło wuspěšne wuwiśe jsy w slědnych lětach. Luźe z Mrocneje su pódšmarnuli, až trjebaju pomoc, aby se pśisłušnosć do serbskego sedleńskego ruma dlej a wěcej ze žywjenim napołniła.