Wóna hyšći njejo taka znata we Nowem Casniku. A to ma teke swóju zawinu. Christel Barukowa ga njoco tak wjelgin we srjejźišću, we swětle stojaś, jo skerjej śicha. A to, rownož ma wjele k wulicowanjeju ze swójogo žywjenja.

Naroźiła jo se 1938 na swójom dwórje ned slězy strjažojskego zwóna. Tam bydli hyšći źinsa. Ale změniło jo se wjele. Něnto jo wóna ta starka, južo jaden raz samo prastarka. A ma tu gluku, až jo hyšći ze swójim muskim Walterom žywa. Južo 55 lět stej ženjonej. Na jeju dwórje bydli teke jaden wót jeju tśoch synow a šwigerźowka.