Chto jogo njeznajo? Horst Adam, 32 lět šefredaktor Nowego Casnika, jo wšuźi znaty: We našych jsach kaž teke w Měsće.

Gaž smy my casnikarje duce pla Serbow, pšašaju se luźe, co wón gótujo a dla cog njejo sam pśišeł. Až wón buźo ten tyźeń južo 80 lět „stary“, njamógu luźe, ako jogo znaju, tak pšawje wěriś.

Weto jo „naš Horst“ wjelgin wjele ducy za Nowy Casnik. Naše cytarje to derje wěźe. Jo rědko jadno wudaśe, źož njejo nic wót Horsta Adama wótśišćane.

Za to smy my, ta redakcija, jomu wjelgin źěkowne. Wón jo nam mócna pódpěra. A nic jano we pisanju. Horst Adam pšawidłownje korigěrujo naše wudaśa.

Ducy jo wón teke za Pratyju. Južo wjele lět zestajujo Horst Adam toś ten lětny kalendaŕ w našej rěcy a ma kuždy raz wjele dobrych idejow. We mjenju Ludowego nakładnistwa Domowiny se jomu za to wutšobnje wuźěkujomy.

Jogo nejwětša wósebnosć pak jo, až jo Horst Adam wjelgin rad mjazy luźimi, wósebnje na zapustach a drugich wejsnych swěźenjach. To jo, tak se jomu zda, samo jogo žywjeński eliksěr. A wšuźi njejo wón jano znaty, ale teke pśipóznaty a woblubowany.