Lěwica lubi, až co na europskej rowninje se wó nastupnosći etniskich mjeńšynow staraś. Lětosa buźo wuzwólowanje do parlamenta Europskeje unije, a pśi tej góźbje su Lěwicarje kóńc februara na Bonnskej partajskej gromaźe wobzamknuli swój program za Europsku uniju.

Do njogo su mjazy drugim zapisali póžedanje, až Europska unija dej pśewześ zagronitosć za woplěwanje a pódpěru wšyknym etniskim mjeńšynam, ceło we duchu europskeje wobydlaŕskeje iniciatiwy Minority Safepack, za kótaruž we cełej EU 1.120.000 pódpismow jo wordowało nazběranych. Kulturna a rěcna wjelerakosć Europy póderbi pśisłušnego politiskego pśipóznaśa a pódpěry mjeńšynam z boka wšyknych institucijow EU − pišu we programje.