Z Póstupima/Potsdam. Nowe wustawjenje dla serbskeje wucby (Sorben-Wenden-Schulverordnung) njebuźo lětosa gótowe, dej-li ministaŕstwo se ze Serbskeju radu dalej wó konsens jadnaś a jeje póžedanja wopytaś dopołniś. Realistiski termin, źož by wóno mógało chopiś płaśeś, jo šulske lěto 2020/2021. To jo na wobradowanju Serbskeje rady wałtoru tyźeń gronił statny sekretaŕ dr. Thomas Drescher. Wón jo se musał nasłuchaś wjele górkich słow, z kótarymiž Angela Šurmanowa wót Serbskeje rady jo ministaŕstwo šwikała. Konsens dla wustawjenja pśecej hyšći njejo dostany, a kóńc legislaturneje periody se pśibliža. Nicht njewě, kake politiske wobstojnosći budu nastaś pótom.