Turjej ma pśisamem 700 wobydlari (gromaźe z Maznikami a Šejnejdu), a 34 wót nich pśisłuša tuchylu Domowinskej kupce.

Ta sama wobstoj južo wót lěta 1949, źož na załožaŕskej zgromaźinje jo se wobźěliło wokoło 200 cłonkow. Pózdźej pak, we 50tych lětach jo ta licba se chwjała mjazy 20 a 40 cłonkami. Wót lěta 1992 nawjedujo ju Harald Końcak, dłujkolětny wjednik Domowinskego běrowa w Dolnej Łužycy a něgajšny pśedsedaŕ Serbskeje rady. Kaž sam groni, jo wón to pśedsedaŕstwo pśewzeł skerjej z nuze wen, dokulž pó politiskem pśewrośenju njejo se nicht wěcej wó to serbske starał a kupka jo na droze k wu-mrěśu była.

To pśewześe jo wugbało, až kupka jo se wótžywiła. Což Domowinski běrow jo kupkam za jich źěło pśiraźował, to jo jogo wjednik ned na měsće sam ako pśedsedaŕ kupki we praksy wuwjadł. A to jo wóstało až do źinsajšnego dnja tak. K tomu słuša wjelgin aktiwny plan za cełe lěto, ak wopśimjejo nagromadu 12 abo 13 tšojenjow. Ceło prědku stoj wu nich zgromadnosć. Cłonki se priwatnje derje znaju a organizěruju zmakanja, wjacory z grilowanim a wulěty.

*