Wjednik domowinskego běrowa w měsće Marcus Końcaŕ jo we rozpšawje wuzwignuł, až ta zastajona wokrejsna reforma jo weto měła dobry kóńc. Pśeto pśi tom jo Domowina ze Serbskeju radu formulěrowała to póžedanje, až we kuždem wokrejsu sedleńskego ruma dej se pśistajiś głownoamtski zagronity za serbske nastupnosći. Reformu njejsu pśewjadli, ale to póžedanje jo wóstało – pśeto serbski sedleński rum jo se pówětšył. Ministaŕstwo za wědomnosć, slěźenje a kulturu jo se tomu pśichyliło, a wobej kněžarstwowej frakciji stej do togo zwóliłej. „My móžomy dla togo spokojom byś“. Wažne jo, až kraj Bramborska pśewzejo kosty. Weto su z městymi we někotarych wokrejsach se woborali a njejsu kśěli taki „dar“ kraja pśiwześ – jo Końcaŕ zaspomnjeł.

To śěganje wó sedleński rum njejo hyšći dokóńcowane: 15 gmejnow abo jich źělow jo skjaržyło pśeśiwo wusuźenju, až deje do sedleńskego ruma słušaś. Tuchylu pśisłuša serbskemu rumoju 37 komunow abo jich źělow.