Lětosa buźo se wuzwólowaś Rada za nastupnosći Serbow w Bramborskej (krotko: Serbska rada). Pśedsedaŕstwo dolnołužyskeje Domowiny dej něnto prědnu kšoceń gótowaś a se staraś wó pówołanje wuzwólowańskego wuběrka (Wahlausschuss): zestajaś lisćinu kandidatow za njen a z nich pótom źaseśoch cłonkow wuběrka wuzwóliś. To jo wobzamknuła zgromaźina dolnołužyskeje župy.
Z tym zrownju su wšykne Domowinske kupki napominane, aby kandidatow za ten wuběrk pytali.
Chylu pjerwjej jo se zwignuła wótša diskusija: Měto Nowak ako zastupnik bramborskego ministaŕstwa za wědomnosć, slěźenje a kulturu jo wjednistwo župy šwikał, až to pówołanje wuzwólowańskego wuběrka stanjo se tak pózdźe. Za jogo suźenim muse na to glědaś, až lětosa buźo teke wuzwólowanje bramborskego parlamenta.