Slědna wuglowa elektraŕnja dej se nanejpózdźej wótšaltowaś w lěśe 2038, a pótrjefjonym wuglowym stronam dej se dostaś zarownanje a pomoc we wusokosći wjelich miliardow euro za pśetwarjenje góspodaŕstwa. We Łužycy buźo se pśi tom teke na serbske pótrjebnosći glědaś.
Na to jo sobotu tyźeń, pó wjele mjasecach źěła a jadnanja, se wujadnała Komisija za góspodaŕske rosćenje, pśeměnjenje góspodaŕskich strukturow a źěło (abo krotko: wuglowa komisija). Jeje pśiraźony plan za wótstupjenje wót wugla dej se něnto ako kazń formulěrowaś a wobzamknuś. Kanclaŕka Angela Merkelowa jo signalizěrowała, až co se jomu pśichyliś.
To groni: Na Łužycu wulejo se we pśichoźe tšuga pjenjez. Z nimi dej něco nastaś, což te skóńcowane źěłowe města a zastajonu wuglowu industriju narownajo. Łužyca dej ako region atraktiwna wóstaś a nic hyšći raz do krize padnuś, kaž južo raz pśi kóńcu DDRskego casa.