Z Wětnice/Wiednitz. Źož hynźi maju tśeśi źeń gód (27. december) pokoj, jo we tej jsy njedaloko Kulowa ruš ako na camprowanju. Wšak campruju teke Wiknicarje we februarje. Na tśeśi źeń gód ale wjaseli se młoźina cełe lěto, groni Markus Bredemann. Wón jo šef wejsneje młoźiny. Na tom dnju wóze mjadwjeźa pó jsy. Ceła młoźina njejo pódla, jano te kjarle. To zachopijo se na reji wjacor 26. decembra z pantomimu.

We srjejźi stoje wejsańske tšojenja. Tenraz jo šło wó wejsnu kjarcmu – wšak budu ten „Jägerhof“ zacyniś. Drugu kjarcmu jsy su južo pśetwarili do starcownje.

Zajtša 27. decembra jo se muskeca młoźina zasej zmakała za kjarcmu, źož maju swój młoźinski klub. Wšake pśegótowane póstawy su wiźeś, wšak njejo jano „mjadwjeź“ ducy na tom dnju. Njejsu wóni mucne? „Źo ga, jo źe južo zeger wósymich! Pjerwjej su se južo styrich zmakali.“ Zeger styrich, to jo zwětšego pótrjefiło „te carne“.

„Te carne“