Taipeh. Jadnab 200 zajmcow jo „Mjazynarodna konferenca wó rewitalizaciji rěcy Hakka a mjeńšynowych rěcow“ 15. a 16. decembra w Taipeju pśiwabiło, to jo głowne město Taiwana. Mimo taiwanskich stej byłej Rada za nastupnosći Hakka a Koleg za rěc Hakka a socialne wědomosći na Taiwanskej Narodnej centralnej uniwersiśe (NCU) referentow ze sedym krajow pśepšosyłej, aby rozpšawili wót swójich nazgónjenjow z rěcami – ainu w Japanskej, z walizišćinu we Wjelikej Britanskej, bretońšćinu we Francojskej, katalańšćinu w Spańskej, nižozemšćinu w Belgiskej, z rěcu Samow w Finskej a ze serbšćinu w Nimskej. Mimo asistentki-profesorki dr. Fen-Fang Tsai z NCU, kótaraž jo swóju disertaciju wó serbskich žeńskich pisała, su pśedsedarku Serbskego šulskego towarstwa Ludmilu Budarjowu ako powědarku zdobyli. Ju jo pśewóźowała dr. Cordula Ratajczakowa ako gósć kongresa.