Z Noweje Jsy/Neuendorf. W młogich domach a swójźbach w Nowej Jsy su měli na gódownem swěźenju a na dnjach až k Nowemu lětoju wósebnje rědnu zaběru. Su pśeběrali nowe tłuste knigły a we nich južo pilnje cytali – ga w nowej wejsnej chronice „Die Geschichte des Dorfes Neuendorf (Nowa Wjas)“. Ta jo měła pětk pśed gódami, 21. decembra, swóju premjeru. Wušej 150 wobydlari ze jsy – něntejšne a něgajšne – a ze susednego Husa a Barbuka jo pśichwatało do gósćeńca „Kastanienhof“, aby prědny raz wiźeli a kupili toś te tłuste a bejnje śěžke knigły (2,3 kg).

Na dogromady 550 bokach jo w źaseś wětšych a 47 mjeńšych kapitelach šyroko wopisana dłujka historija teje nimsko-serbskeje jsy w picańskem amśe z lěta 1554, ako bu Nowa Wjas prědny raz naspomnjeta, až do źinsajšnego casa. K tomu słuša wokoło 830 fotografijow, mólowankow, kortow, wurězkow z casnikow a casopisow, statistikow a dalšnych ilustracijow.