Pśedsedaŕstwo župy Dolna Łužyca jo na wobradowanju 13. decembera se zaběrało z póžedanim Hanza Wylema-Kella: Wón co Domowinje pśistupiś.

Hanzo Wylem-Kell, doma w Huštanju/Wüstenhain (źěl Wětošowa), njejo jano jaden z 12 dolnoserbskich cłonkow Serbskego sejma, ale teke jaden z głownych iniciatorow togo nowego gremiuma. Wón jo w septembrje župje k wěsći dał, až co pśistupiś Domowinje. Wón co zastupiś do wětošojskeje kupki a pśinosowaś, až buźo zasej a aktiwna. Wóna ga tuchylu wěcej njeźěła, žedne cłonki pak tam hyšći su, pśedsedaŕstwo pak nic. Pódpěraś co teke serbske žywjenje w měsće, mjazy drugim Witaj-źiśownju „Tyca“. Do njeje chójźitej jogo dwě góleśi. Teke w chorje „Łužyca“ jo raz sobu spiwał a pódpěrał załoženje Witaj-projekta w źiśowni w Hochozy a Strjažowje.

Na pósejźenju župnego pśedsedaŕstwa jo Hanzo Wylem-Kell rozjasnił, dla cogo ma prědk, pśistupiś Domowinje. Wón móžo we njej derje pśinosowaś, až serbska rěc a kultura dalej buźotej. „Mója funkcija w Serbskem sejmje a sobuźěło w Domowinje njestojtej se napśeśiwo. Za serbstwo móžoš na wšaki part źěłaś“.