We starstwje 91 lět jo na 9. decemberu wumrěła Irmgard Kulejowa z Bukowa (Groß Buckow), znata ako serbska ludowa wuměłcowka. Wóna jo se dožywiła we starcowni w Lubušu (Laubusch).

Wóna jo była wuwucona fotografowka. Wót 1970tych lět jo mólowała ze šćotku abo drugim rědom serbske nałogi, swóju narodnu wjas Bukow (až do wótbagrowanja), a teke towarišnostne žywjenje pśed a pó politiskem pśewrośenju. Wóna zawóstajijo wjeliku zběrku swójich źěłow. K tym samym słušaju teke sukane tepichy a jatšowne jaja.