Gaž budu znowa 26. maja w gmejnach, městach a wokrejsach w Bramborskej wuzwólowaś nowe komunalne parlamenty a ludowe zastupnistwa, pón wěcej njezmějomy w Chóśebuzu 5 wólbnych wokrejsow, ale jano hyšći styri. To jo měsćański parlament wustajił, za tym, ako běšo sudnistwo rozsuźiło, až njejo było pśi slědnych komunalnych wólbach 2014 to rozdźělenje do wólbnych wokrejsow w Chóśebuzu pšawe a spšawne. Žedne su měli wjele wólarjow, a te druge zasej wó wjele mjenjej, a to pó kaznjach njesmějo tak byś.

Do nowego wólbnego wokrejsa 1 słušaju Depsk, Žylow, Škódow, Rogozno, Žylowk, Dešank, Zaspy a Chmjelow. Wón jo pó teritorimje ten nejwětšy, ale pó licbje wobydlari a wólarjow ten nejmjeńšy, něźi wó 7 % mjeńšy ako te druge. Wólbnemu wokrejsoju 2 pśisłušaju Strobice a Chóśebuz-srjejź, k wokrejsoju 3 Grodkojske pśedměsto (Spremberger Vorstadt) a Knorawa a k wokrejsoju 4 Žandow, Rogeńc, Modłej, Kórjeń, Kibuš, Gołynk a Gogolow.

Za nowu měsćańsku zgromaźinu deje 50 cłonkow wuzwóliś, a w měrcu 2019 buźo se nejskerjej zachopiś to mócne wójowanje mjazy partajami a kandidatami.

Kuždy pěty gójc z drugego kraja