Z Chóśebuza/Cottbus. Program Schadowanki sobotu tyźeń jo měł kradu młody a moderny wjazym a wusoki niwow. Serbska jazz- a soul-muzika, rozpokazowanje mo­dy a kabaret su słušali k wjeraš­kam. Program stej moderěrowałej wuknicy 12. klase Maja Šramojc z Gołbina na nimske a Anja Zachariasojc z Kósobuza na serbske.

Južo na prědne póglědnjenje jo se śi něco hynakše zdało ako we pjerwjejšnych lětach. Ten wjeliki transparent, ako kužde lěto wisy wušej jawišća, z napismom „Schadowanka“, jo se z wócowu pśiglědarjow minuł. Město njogo jo prězy pśi jawišću stojał beamer z płachtu, źož jo se błyšćał logo Schadowanki. Beameroju jo była wažna funkcija pśimyslona. K prědnemu su se na płachśe pokazali teksty k sobuspiwanju, mjazy nimi tekst togo luštnego spiwanja, ako kuždy raz se spiwa: Jěšnica z pjera ceptaŕki Angele Šurmanoweje. Pśiglědarje su te spiwanja gromaźe ze šulskim chorom pód nawjedowanim Geralda Schöna sobu zgłosyli, a njejsu musali glědaś na łopjenka.

*