Janšowarje změju 8. decembra wót zeger 15:00 gódowne wiki na farskem dwórje. Tam budu budki, karusele, warjone wino, a bog buźo se pśipóraś. Wušej togo budu słyšaś gódowne melodije wót janšojskich dujarjow, a janšojski žeńskecy chor spiwa z drjejcańskim chorom w cerkwi. Muzej buźo wótcynjony.

8. a 9. december, budu „Błośańske gódowne wiki“ na Lědach, pśecej wót zeger 10:00 do 18:00. Wósebnosć tam jo, až móžośo ze cołnom dojěś wót wustawadlišća (Großer Spreewaldhafen) w Lubnjowje. Tam su gódowne wiki. Na cołnach budu teke lutki. Zawěsće móžośo direktnje na Lědy pśiś, źož kśě pokazaś „Gódy ako pjerwjej“ w tamnem muzeju pód gołym njebjom. Zastup na Lědach płaśi 6 euro, za źiśi jaden euro. Chtož co teke na Lubnjojske wiki a pótom z cołnom na Lědy, ten dej na měsće 15 euro zapłaśiś (źiśi 7 euro) abo do togo korty wobstaraś za 13 euro (źiśi 8 euro).

We gmejnskem centrumje buźo 8. a 9. december wót zeger 13:00 adwentska wustajeńca. Lajske wuměłce pokazuju how swóje źěła k temoma adwent a gódy, to groni drjewjane źěła, gwězdki abo gjarnce a wobraze.