Z Bórkow/Burg/Spreewald. Slědnu sobotu, 24. nowembra, jo dostała žylojska źiśownja „Mato Rizo“ krajne myto Miny Witkojc. To jo docełego prědny raz, až take myto za wósebny angažement na pólu serbskeje rěcy su wupisali. Wjednicy teje Witaj-kita Dianje Buchanowej jo to myto pśepódała ministarka za wědomnosć, slěźenje a kulturu Martina Münch. Cesćenje jo było w bórkojskej šuli „Mina Witkojc“.

Nowe myto we wusokosći wót 2.500 euro jo nastało w ramiku zwopšawdnjenja krajnego plana za zmócnjenje serbskeje rěcy w Bramborskej z lěta 2016.

Pśiklask pśibytnych wokoło 80 luźi jo dostała ministarka nic jano za pśepódaśe myta, ale teke za to, až jo swójo swěźeńske nagrono źaržała w prědnych sadach w dolnoserbskej rěcy.

Ministarka ga jo z tym demonstrěrowała, až njejo serbska rěc „jano“ wěc kaznjow, ale až jeje ministarstwo, wóna wósobinski a cełe kněžarstwo za tym stoje, až dej se teke kradu na to źiwaś, se staraś a se procowaś, až naša rěc se napšawdu powěda a až licba powědarjow nadalej pśiběra. Z takimi symboliskimi słowami ministarki rosćo prestiž dolnoserbskeje rěcy.