Z Dešna/Dissen. Sobotu pśed dwěma tyźenjoma, 10. nowember, jo muzika w kjarcmje „Serbski dwór“ grała, pśeto dešańska Domowinska kupka jo na serbsku kjarmušu kazała. Zachopjeńk jo južo wósymich był, dokulaž su kśěli teke starše wobydlarje pśiwabiś. To jo sobuorganizatorka, Uta Hentšelowa, wulicowała.
K rejam jo kapała „Lausitz Blech“ grała, mjazy spiwanjami jo Michael Apel stare serbske reje rozkładował, na pśikład dwě warianśe polki, kótarejž publikum w dalšnem źělu wjacora jo mógał we praksy ned nałožyś. Pśez to su wobźělniki malsno nowe reje nawuknuli, ale teke „stare wuchace“ ako „rucki-zucki“ njejsu felowali.