Z Mósta/Heinersbrück. Na reformaciskem dnju, 31. oktobra, su swěśili lokalna wósada a serbske luźe wót wenka zgromadnje serbsku-nimsku namšu z Bóžym blidom w mósćańskej cerkwi.

Serbski dušepastyŕ Ingolf Kśenka, kótaryž jo tam teke wósadny faraŕ, jo zwězał namšu na dwě wažnej głownej temje: K prědnemu jo swěśiła tamna wósada, až mósćańska cerkwja ma skóńcnje zasej pórědne kšywo. Rownož su ju akle w lětoma 1900/1901 natwarili, su tam wót lěta 1945 wjelicke škódy byli. Nimski komando SS jo kśěł rozbuchaś cerkwiny torm w aprylu 1945. Turm jo stojecy wóstał, jo pak kśiwje stojał a kšywo jo měło wjelike škódy. Orgele su byli rozbuchnjone a docysta znicone.

Wósada jo pó wójnje kšywo zasej do rěcha spórała. Jaden bok su pśed 17 lětami pśekšyli, na drugem boce njejo se doněnta nic stało. Na taki part su měli pśecej a zasej wušparanja z kšywom. Gaž jo wěcej padało abo štormowate jo było, su musali kšywo wupórěźaś. Tak njejo dalej šło, jo měniła Christine Adamowa, pśedsedarka wósadneje rady.