19. oktobra togo lěta jo se zejšło Zwězkowe pśedsedarstwo Domowiny k swójomu 8. pósejźenju pó łońskej 18. głownej zgromaźinje Domowiny. Tenraz su se cłonki pśedsedarstwa zmakali w Chóśebuzu, a to w Dolnoserbskem internaśe. Casnik jo se pśi tom wobźělił a wšake wót togo, což jo se tam wobjadnało, diskutěrowało, k wěsći dało a wobzamknuło, móžośo how cytaś.

19. głowna zgromaźina Domowiny se pśigótujo

30. měrca pśiducego lěta pśewjeźo Domowina swóju južo 19. głownu zgromaźinu. Delegaty z cełeje Łužyce su k tomu pśepšosone do gmejny Chrosćicy/Crostwitz we wokrejsu Budyšyn. Tenraz buźo to normalna zgromaźina, to groni mimo wuzwólenja zwězkowego pśedsedarstwa a Domowinskego pśedsedarja. Gódnośiś buźo se źěło Domowiny a jeje župow a towaristwow pó 18. głownej zgromaźinje, ako běšo se wótměła łoni we Wórjejcach/Hoyerswerda. Wobzamknuś budu se teke źěłowe směrnice (Arbeitsrichtlinien) za Domowinu za lěta 2019 do 2021, a pśedwiźone su ewentualne změny Domowinskego statuta.