Pśed 30 lětami smy byli wuknice a wukniki Serbskeje rozšyrjoneje wušeje šule „Marjana Domaškojc“ w Chóśebuzu a smy tam zgromadnje abituru absolwěrowali. Něnto jo cas był za zasejwiźenje, a to we kšasnych Błotach, w Lubnjowje. How bydlitej dwě wót něgajšneje rědownje: Queenie Nopperojc a Katrin Lehmannojc. Z kwětkami a głažkom sekta stej wutšobnje pśiwitałej rědownisku ceptarku, kněni Jadwigu Krokorjowu. Wóna wuglěda tak młoda kaž tencas, ako jo w lěśe 1984 rědownju 9/1 pśewzeła. Zgromadnje z dalšnymi wuknicami jo wóna na toś tom słyńcnem nazymskem dnju z Chóśebuza pśišła.

Druge su měli dlejšu drogu: su pśišli z Rownego a z městow Werder, Barliń, Drježdźany, Göttingen a samo Wien.