Z Chóśebuza/Cottbus. Na Serbskem bliźe srjodu tyźeń w Měsćańskem muzeju jo šło wó rolnikarsku temu. Gósći z Dešna, Strjažowa a Žylowa su dejali wulicowaś wót załoženja prodrustwow (Produkstionsgenossenschaften, LPG).
Nejpjerwjej jo něgajšny šołta Wyli Gusor ze Žylowa rozkładował, kak jo se ta zgromadna drustwowa rolnikarska produkcija zachopiła. Te LPGeje su byli rozdźělone do tśich typow, „typ 1“, „typ 2“ a „typ 3“, pśi com „typ 2“ njejo wjeliku wažnosć měł. W Žylowje jo dało prědne prodrustwo, wóno jo była wót typa 3. To groni, až wšykna rola a zbóžo jo słušało prodrustwoju. Pśed tym jo wjele luźi tšach měło ‒ stej Marjane Worakowa z Dešna a Erna Hoffmannowa ze Strjažowa wulicowałej. Wjele luźi njejo do prodrustwa kśěło, togodla su młoge se togo wuswójenja (Enteignung) wobinuli, pśez wuběgnjenje do pódwjacora abo pśez pśedanje dobytkow za casa.