Njeźelu, 2. septembra, jo město Drjowk pócesćiło swójogo znatego syna – cesnego bergarja Lotara Balka/Balkego – z pósćenim jogo mjenja za wót njogo załožonu Tkajarsku śpu. [pśispomnjeśe redakcije: jogo mě pišo se wšako – raz we pśenimconej formje Balke, raz we resorabizěrowanej Balko]. Tak se pomjenijo Tkajarska śpa wót něnta „Dom dr. Lotara Balka“. Drjowkojski šołta Dietmar Horke jo pśednjasł lawdaciju. Zastojaŕ města, Torsten Richter, jo we pśitomnosći krajnego raźća Haralda Altekrügera, jogo žeńskeje a Ani Balkoweje cesnu toflu wótekšył. Stało jo se to pó namšy a ku góźbje studnjowego swěźenja, tak až jo naglědna licba luźi pśitomna była, inkluziwnje studnjowe soniny a bóśon. Góźba pśicynjenja cesneje tofle jo pak teke był 10. pósmjertny źeń Lotara Balkego, ako jo 2. oktobra 2008 wumrěł a ma na drjowkojskem kjarchobje cesny row.
Chto jo Lotar Balke był? – Jogo žywjenje a statki