Z Potsdama/Potsdam. Wjelike wjasele jo se kněžyło 12. septembra we Serbskej raźe a mjazy drugimi, kenž wójuju za hyšći lěpše pšawa Serbow w Bramborskej.

Na tom dnju jo wobradował głowny wuběrk krajnego sejma teke dla změnow serbskeje kazni. Wósebnje jaden dypk jo był kradu wob­zwadny: Lěc deje měś wšykne wokrejse we serbskem rumje głownoamtskego zagronitego za nastupnosći Serbow. Tuchylu matej take jano SPN (z poł městnom) a město Chóśebuz. LDS a OSL stej se kradu pśeśiwo tomu woborałej. We jadnom słuchanju jo krajny sejm se južo pśed lěśojskeju pśestawku zaběrał z tymi kontrowersnymi pozicijami.

Dla wjelikego woboranja wokrejsowu jo było až do kóńca njejasne, kak buźo głowny wuběrk rozsuźiś. Dlatog jo było wjasele na boce Serbow wósebnje wjelike, až jo pśizwólił, až budu te zagronite we wšyknych wokrejsach. Teke te pjenjeze za tej městnje pśidu wót kraja. Pozitiwnje jo teke, až deje wšykne zagronite měś swóje źěłowe městna we wokrejsnych zastojnstwach. A nic w Błotach, źož njedostanu nic sobu wót togo, co se w zastojnstwje wutichtuju.