Rozdźěle mjazy stronami su wjelike, což nastupa źiśownje a góletkownje. To jo měriś na personalnem klucu. Wón groni, za wjele źiśi jadna wótkubłarka jo zagronita.

Optimalny personalny kluc jo, gaž ma w źiśownjach jadna wótkubłarka 7,5 źiśi na starosći a w góletkownjach tśi, pišo Bertelsmannowa załožba. Wóna jo pśed tyźenjom pśedstajiła „Ländermonitor Frühkindliche Bildungssysteme“. Někotare kraje maju wósebny dobry personelny kluc, ako Baden-Württembergska. We drugich jo kluc kradu snadny, ku tym licy Sakska. Wótkłon jo wjeliki mjazy pódzajtšneju a pódwjacorneju Nimskeju. Kuždy zwězkowy kraj wustawijo sam swój personelny kluc. Weto su rozdźěle w jadnotliwych krajach wjelike.

Tak jo w Baden Württembergskej nejlěpšy personelny kluc w góletkownjach, źož se jadna wótkubłarka stara wó 3 góletka, w Sakskej pśisamem wó 6. W Bramborskej jo to 5,8 źiśi na wótkubłarku. W Chóśebuzu stara se kužda wótkubłarka wó 6,2 małkich źiśi. We wokrejsu Sprjewja-Nysa jo to 5,6 źiśi za kuždu wótkubłarku. We wokrejsoma Budyšyn a Zgórjelc jo jadna wótkubłarka w góletkownjach zagronita za 6,5 źiśi.