Z Huštanja/Wüstenhain. Partaja Łužyska alianca jo na zgromaźinje njeźelu pśed dwěma tyźenjoma wumjeniła 11 kandidatow za Serbski sejm: źaseśoch za Dolnu Łužycu (wót nich su tśo ze srjejźneje Łužyce) a jadnogo za Górnu Łužycu. Wóni pśidu z Chóśebuza, Wětošowa, Źiwiz, Kózlego, Bólašojc pla Kalawy, Rownego, Mužakowa a Chrósćic ‒ jo pśedsedaŕ ŁA Hanzo Wylem-Kell Casnikoju powěźeł. Jich mjenja njejo wón zjawił, měnjecy, až nejpjerwjej buźo wuzwólowańska komisija te kandidaty pśipóznaś. A to oficielne znatecynjenje stanjo se na 17. septemberu (cas pśipowědanja kandidatow jo wordował pódlejšony).

Za powěsću Wylema-Kella su někotare kandidaty ‒ starjejše wuknikow, ako wuknu serbsku rěc ‒ se wugronili za wuwažony dwěrěcny šulski system blisko bydlenja, za serbske rěcne rumy zwenka šule a powšykne znaśe kulturnych kórjenjow Łužyce. Druge su gronili, až kśě se zasajźiś za regionalne góspodarske woběgi, lěpšu infrastrukturu a wěcej kontaktow a wuměny (Austausch) pśez granicu k Pólskej a Českej.