Nowa sezona 2018/19 za balokoparjow jo se zachopiła, teke w Dolnej Łužycy. Energija jo w 3. profijowej lize južo dwójcy dobyła, a na kóńcu awgusta se daju mustwa we wokrejsnej wušej lize a wokrejsnej klasy zasej do wójowanja wó dobyśa a dypki.

Teke „Serbske koparje/Wendische Auswahl“ maju swóje konkretne plany a pśedstajenja wó źěle w pśiducych mjasecach a samo južo za pśiduce lěto. Z tym jo se pśedsedarstwo togo Domowinskego towaristwa, ako bu łoni w aprylu w Dešnje załožone, na swójom pósejźenju kóńc julija zaběrało. Južo w septembrje coju se serbske balokoparje – jich jo dogromady wokoło 25 ze pśisamem 15 jsow a mustwow – zmakaś na prědny zgromadny trening, tak ako pśecej na sportnišću w Dešnje. W januarje 2019 by se kśěli rad zasej wobźěliś pśi wjelikem turněrje we „Łužyskej arenje“ w měsće, pó tom, až běchu tam lětosa napšawdu derje wobstali. Lice ga z tym, až budu zasej pśepšosone.