W Žylowje jo swěśił 30. junija faraŕ na wuměnku Dieter Schütt swój 80. narodny źeń. Wušej hundert luźi jo tam pśichwatało, aby jomu swóje glukužycenja pśepódali. Kóńc julija, ako jo zasej měr był wu Schüttojc, jo se Casnik tam wupórał a jo narski był, co wón jo we tych 80 lětach wšykno dožywił.

Prědny zaśišć jo: Pla Dietera Schütta a jogo manźelskej Chrysty njejo pó 80. narodnem dnju žeden měr zaśěgnuł. Južo pśi telefonje, ako smej wucyniłej termin za rozgrono, jo wón gronił, až tuchylu zastupujo swójogo syna Hansa-Christopha, kótaryž jo faraŕ we Wjelcej. To groni, až tam pšawidłownje jězdźi, namše źaržy, zakopowanja wobstarajo a tak dalej. Ako jo casnikarka tam była, jo telefon zwónił tśi raze dla togo: Luźe su kśěli z nim wšake rědowaś za pśiducu namšu. Faraŕ Schütt pódpěrujo pšawidłownje teke namše w Picnju, Drjenowje, Módłej a Hochozy.