W lěśe 1969 jo chopił w DDR źěłaś 2. telewizijny program DFF (Nimski teliwizijny rozgłos). Chtož jo se k tomu ekstra antenu kupił, jo mógał w Błotach něnto pěś nimskich programow dostaś. Gaž jo było dobre wjedro, teke jaden pólski. Ako su w lěśe 1984 w BRD priwatnu telewiziju zwólili, su zagronite politikarje wobtwarźili, až to se stanjo, aby pśiglědarje měli wětšu wjelerakosć. Ale dokulaž muse se priwatne sćelaki z wabjeńskich nabrankow financěrowaś, jo było, jo a wóstanjo jich głowny cil, wjele wabjenja pokazaś. Togodla njejo žeden źiw, až sy mogał až do lěta 1990 w Dolnej Łužycy ARD a ZDF glědaś, ale nic RTL, dokulaž, chtož njamóžo nic kupiś, njejo adresat priwatnych sćelakow.