Komentar k artikloju „Na kupje DSG žywy byś“ w NC 26/27.6.2018, na prědnem boce

Wót lěta 2006 dawam Witaj-wucbu, wót lěta 2016 tek až do 10. lětnika. Ta frejda Witaj wucyś rosćo pla mnjo dlej a wěcej. Fakt jo, až Witaj jo wjelika šansa, a to se wě, až młoge starjejše maju tšach: „Mójo góle to nješafnjo!“

Mamy dwě metoźe serbsku rěc wuknuś. To źo kaž z engelskeju rěcu ako cuzeju rěcu, abo we Witaj-wucbje ako druga rěc. Wobej metoźe funkcioněrujotej. Wucyś Witaj wěcej wót ceptarja pomina nježli cuzu rěc wucyś. Ja njejsom rozměł, dla cog‘ maju na DSG take problemy. Witaj-metoda ma lěpšyny a njelěpšyny. Lěpšyna jo ten słowoskład, wón malsnjej rosćo. Njelěpšyny su, až cesto ma wuknik wjele gramatiskich zmólkow. To jo intereferenca a pśejźo raz mimo. We Witaj-wucbje ga nje­zwucujom deklinacije atd. Gaž ceptaŕ te zmólki surowje wótštrofujo, pón skóńcujo Witaj. Rěcne rumy maju jaden princip: Tam se powěda serbski, to jo šćitany, wobzwarnowany rum. Pśez taki rum rěc se lěpjej nawuknjo.