Doreen Hugnagelowa jo měła slědny tyźeń wósebnje śěžki nadawk: Rozžognowanje wót „swójich“ źiśi. Ako wjednica serbskego internata jo měła wuski kontakt z tamnymi młodostnymi. Na fośe pśepódawa jej Filip tortu, kótaruž su wukniki sami za nju wupjakli. Foto: B. Melcher/RCW 
Z Města/Cottbus. Dłujkolětna wjednica serbskego internata Doreen Hufnagelowa jo měła tam 28. maja swój slědny źěłowy źeń. Wót junija źěła wóna na janšojskej šuli ako ceptarka za serbšćinu a wěcnu wědu. Casnikoju jo wulicowała, až jo měła južo tšach pśed rozžognowanim z wuknikami.
Dopołdnja pak su byli nejpjerwjej te słužbne rozžognowanja, kótarež su byli teke wutšobne. Dary pśepódali njejstej jej jano jeje direktny pśedstajony dr. Viktor Zakaŕ a wjednica Rěcnego centruma Witaj dr. Beata Brězanowa. Wót njeju jo dostała mjazy drugim słodku tutawku (Zuckertüte) za nowy zachopjeńk w janšojskej šuli. Teke Měto Nowak wót pódstupimskego kněžarstwa jo pśišeł se rozžognowat. A se wě, až jo tam było wjele kolegowkow a kolegow kaž teke drugich partnarjow pśišło se wuźěkowat a jej wšo dobre žycyt.
