Z Lipska/Leipzig. Pśedslědnu sobotu jo młoźina z Dolneje Łužyce woglědała do Lipska. Wšykne su wukniki a źěłaju we młoźinskim wusćełanju „Bubak“ pla RBB. Jich stej pśewóźowałej wjednica serbskego studija rbb Marion Stenselowa a sobuźěłaśerka rbb Katarzyna Fidekowa. Woglěd Bubakow do Lipska dej se wiźeś ako „wótegrono“ na wizitu lipšćańskich študańcow w juniju 2017 do Hochoze, źož ideja takeje wuměny (Austausch) mjazy Lipskom a Dolneju Łužycu jo nastała.

Gósći su gromaźe z něgajšnym stipendiatom Załožby za serbski lud Aleksandarom Jovanovićom ze Serbiskeje woglědali uniwersitnu biblioteku, Institut za sorabistiku a centrum Lipska.