Z wiźenja iniciatiwy historiske wokognuśe – 1. maj na Krabatowem swěźenju w Carnem Chołmcu: Wuwołanje wu zwólowanja prědnego serbskego parlamenta. Wót lěwego boka k pšawemu: Jadwiga Pjacec (powědarka Rady starostow), Tomaš Čornak (šołta gmejny Njebjelčicy), Gertrud Winzerowa, dr. Měrćin Wałda, Ignac Wjesela, dr. Měrćin Krawc, dr. Hagen Domaška (wuzwólowański wjednik), Hanka Krawcec. K nim jo se pśiderił we wokognuśu wuwołanja dolnołužyski powědaŕ iniciatiwy Hanzo Wylem-Kell (njejo na fotografiji). 
Z Carnego Chołmca / Schwarzkollm. Iniciatiwa za Serbski sejm jo wuwołała wuzwólowanje do serbskego parlamenta. To jo se stało kradu na 1. maju wjacor, na kšomje nalětnego swěźenja pśi Krabatowem młynje – dajo iniciatiwa nam k wěsći. Wóni su tam měli južo wót zajtša stojnicu stajonu, pśi kótarejž su někotare cłonki iniciatiwy a Rady starostow ceły źeń stojali a rozdawowali brošury a wjadli rozgrona z woglědarjami swěźenja. Źiśi z Carnego Chołmca su se pśepokazali we serbskej drastwje wórjejskich stronow.
Zeger 18.00 jo Tomaš Čornak, cłonk iniciatiwy a šołta górnołužyskeje gmejny Njebjelčicy/Nebelschütz, wuwitał gósći a źaržał swěźeńske grono. Pótom jo dr. Hagen Domaška, wót iniciatiwy wumjenjony wuzwólowarki wjednik, prědklazował to wuwołanje k wuzwólowanju (Wahlaufruf). We njom jo nagranjał wuzwólowarje, aby se zapisali do wuzwólowarskego zapisa, a serbske towaristwa a kupki interesow, aby wumjenili swóje kandidaty. A wón jo rozkładował nejwažnjejše regule wuzwólowanja z listom (glej w ramiku).
