Wót lěta 2016 póbitujo Rěcny centrum WITAJ pśespytowanja za Rěcny certifikat dolnoserbšćiny a Rěcny certifikat górnoserbšćiny. Do něnta su se pśewjadli pśespytowanja na schójźeńkoma A1 a A2. Lětosa pśewjedu se prědny raz pśespytowanja na wušem niwowowem schójźeńku B1.

Pśespytowańske nadawki su nastali we fachowo-wědomnostnej kooperaciji ze Serbskim institutom z.t. a z Institutom za sorabistiku na lipšćańskej uniwersiśe. Na internetowem boce www.sprachzertifikat-sorbisch.de namakaju zajmce mimo powšyknych informacijow wó certifikaśe testowe pśespytowanja za direktne wupołnjenje abo ako download ako teke awdiodataje słuchańskich tekstow. Nowe pśespytowanje B1 wobstoj z pěś źělow: rozmějuce słuchanje, rozmějuce cytanje, rěcne elementy, pisanje a powědanje. Wóno se zarědujo do slědujuceje struktury:

niwow C2 WJELIKI RĚCNY DIPLOM

niwow C1 MAŁY RĚCNY DIPLOM

niwow B2 PÓSTUP II

niwow B1 PÓSTUP I

niwow A2 START II

niwow A1 START I