We wobydlarskem komiteju iniciatiwy źěłaju znate zastupniki wšakich mjeńšynow kaž prezident FUEN (na nimski FUEV) Hans Heinrich Hansen, pśisłušnik nimskeje mjeńšyny w Dańskej, a Anke Spoorendonkowa, něgajšna ministarka za justicu, kulturu a Europu we Schleswig-Holsteinskej a pśisłušnica dańskeje mjeńšyny we Schleswigu. 
Jano hyšći tyźeń buźo to zběranje pódpismow za europsku iniciatiwu Minority SafePack traś. 3. apryl jo wustawjony ako kóńcny termin. Organizacija FUEN a wobydlarski komitej stej dobreje mysli, až ta licba wót 1000.000, ako se pótrjeba, buźo dosegnjona. Pótom buźo Europska komisija musaś se pominanjam iniciatiwy pśiwobrośiś a se z nimi zaběraś.
We tom wokognuśu, ako ten tekst pišomy – dwa tyźenja pśed terminom – feluju we cełej EU jano hyšći jadnab 65.000 pódpismow. Domowina, Serbska rada a Sekretariat mjeńšynow z mócu za to wabje, aby teke luźe w Nimskej pódpisali – wěcej a lěpjej. A bramborski parlament nagranja oficielnje wobydlarje k pódpěranju iniciatiwy. Pśeto , kaž gronje organizatory, „Ty njejsy sam!“ (to jo ten drugi titel iniciatiwy), w Europje ga bydli na 50 milionow luźi, kótarež, kaž serbske luźe w Łužycy, pśisłušaju jadnej mjeńšynje. To pódpisanje jo lažke, wóno móžo se pśez internet staś. Za Casnik jo to góźba dopomnjeś, kake wótmyslenje se za tym chowa a dla cogo jo ta iniciatiwa za serbski lud wužytna. Co to pśinjaso?
